Фота: 1387.io
Размовы пра неабходнасць рамонту вежы, што карануе гасцініцу “Бабруйск”, вядуцца ўжо шмат гадоў. Праз яе аварыйны стан трапіць наверх даўно стала немагчыма. Між тым, гэтая архітэктурная дэталь акурат і адрознівае нашу гасцініцу ад аналагічнай у Берасці, якая носіць назву “Буг”. Дарэчы, “Бабруйск” і “Буг” нават узведзеныя былі ў адным годзе – у 1958.
Берасцейскі блізнюк “Бярэзіны” – “Буг”. Фота: natatnik.by
Гасцініцу можна назваць адной з гарадскіх візітовак, яе выява ўпрыгожвае паштоўкі ды турыстычныя брашуры. Але з часам будынак знасіўся, і калі ў 2010-х яго выкупіла расійская група кампаній “Амакс”, былі чаканні, што гасцініцу хутка прывядуць да ладу. Але пасля пакупкі рамонт некалькі год не пачынаўся – новыя ўладальнікі нанялі генпадрадчыка, які ў выніку судзіўся з імі. Вялікія планы, што ўключалі і адраджэнне легендарнага рэстарана “Бабруйск” ажыццявіліся толькі часткова.
Фота: 1387.io
У мінулым годзе кіраўніцтва агучыла для BOBR.BY планы на 2024-ы: рамонт і афарбоўка вежы, рамонт даху, яго ўмацаванне, частковая замена перакрыццяў. Але, як адзначае партал, летась, паводле словаў арандатараў памяшканняў у “Амаксе”, стан вежы і даху лепей не стаў, на сценах ды столі бачныя падцёкі, а тынкоўка адвальваецца ад сценаў. Некаторыя пакоі на чацвёртым паверсе наогул закрытыя праз кепскі стан і ніяк не выкарыстоўваюцца. Як меркавалі суразмоўцы партала, праблема ўзнікла праз дзіравы дах.
Фота: BOBR.BY
Кіраўніцтва гасцініцы спачатку адмовілася ад каментароў, але пасля публікацыі патлумачыла, што “восенню 2023 года праведзены бягучы рамонт участка даху і ліквідаваная цеча”. Сцвярджаецца, што праведзены тэхнічныя абследавання будаўнічых канструкцый будынка і даху, па заключэнні якіх мусіць быць праведзены капітальны рамонт і замена канструкцыі даху. На гэты момант “Амакс” праводзіць тэндар па пошуку падраднай арганізацыі для правядзення рамонтных работ.
Фота: 1387.io
Хочацца спадзявацца, што рамонт даху і вежы, нарэшце, будзе зроблены. А што думаеш ты на гэты конт? Пішы ў нашым інстаграм!