Ініцыятыва eco.bobr ладзіць гарадскую акцыю па прыборцы смецця на тэрыторыі Бабруйскай крэпасці пад назвай “Чыстая прырода, яе мастак Бог”.
Бабруйская крэпасць. Фота: 1387.io
Калі і дзе пройдзе акцыя
Актывісты заўважаюць, што Бабруйскя крэпасць – помнік гісторыі і архітэктуры, унесены ў Рэспубліканскі спіс гісторыка-культурных каштоўнасцяў Беларусі, мае нацыянальнае значэнне.
“На жаль, не ўсе гараджане прыдаюць гэтым фактам вялікае значэнне. І на тэрыторыі крэпасці ёсць месцы, якія патрабуюць тэрміновай прыборкі, чысціні і парадку”, – пішуць арганізатары акцыі на сваёй старонцы ў Інстаграме.
Экалагічная акцыя пройдзе ў нядзелю, 27 кастрычніка. Пачатак: 14:00.
Кропка збору ўсіх ахвочых прыняць удзел: пляцоўка ля сабору Аляксандра Неўскага.
З сабой трэба ўзяць пальчаткі, у якіх вам будзе зручна (экабары раюць: лепш прагумаваныя ці з тканіны), мяшкі, венікі, саўкі для збору смецця па жаданні.
Усе дэталі акцыі – па спасылцы.
Посмотреть эту публикацию в Instagram
Прыбірай смецце і вучы гісторыю
Будаўніцтва Бабруйскай крэпасці пачалося ў 1810 годзе, напярэдадні вайны з Напалеонам, і вялося да 1836 года. Дзеля яе пабудовы знішчылі старажытны Бабруйск, на месцы якога яна і паўстала.
У розныя гады крэпасць выконвала не толькі абарончую ролю, але і была турмой – тут сядзелі за кратамі дзекабрысты, удзельнікі паўстанняў 1831 і 1863-64 гадоў. У савецкія часы ў крэпасці размесцілі ваенную частку.
На тэрыторыі крэпасці знаходзіцца самы стары будынак Бабруйска – былы езуіцкі касцёл 1747 года, які расейскія царскія ўлады зрабілі цэйхгаўзам (сховішчам зброі), а савецкія – гаўптвахтай. Цяпер былая святыня стаіць закінутай.
Чытайце больш пра крэпасць у нашых ранейшых матэрыялах:
Музей рэпрэсій у СІЗА, квэсты па легендах пра “золата езуітаў”: што рабіць з Бабруйскай крэпасцю?
Падкаст “Міфічны Бабруйск”: Бабруйскія прывіды ды раз’юшаны старажытны дух
«Праз чатыры гады тут будзе горад-сад» ці 18 гадоў мары пра рэканструкцыю Бабруйскай крэпасці
